ब्रेकिंग

क्रीडा

भारतीय कसोटी क्रिकेटमधील रोहितचे योगदान सर्वोत्तम : सचिन तेंडूलकर

Wrutuja pandharpure
09 May 2025

मुंबई : भारतीय संघाचा कर्णधार रोहित शर्मा याने अचानक कसोटी क्रिकेटमधून निवृत्तीची घोषणा केली. रोहितने निवृत्ती जाहीर केल्यानंतर मास्टरब्लास्टर सचिन तेंडुलकरने खास ट्विट केले.

मला आजही आठवते की, २०१३ मध्ये मी माझ्या हाताने ईडन गार्डन्सवर तुला कसोटी क्रिकेटमध्ये कॅप देवून सामील करून घेतले होते. नंतर आपण दोघे वानखेडे स्टेडियमच्या बाल्कनीमध्ये उभे असल्याचाही क्षण माझ्या लक्षात आहे. तुझा कसोटी क्रिकेटमधील प्रवास खूपच उल्लेखनीय आहे. त्या दिवसापासून ते आजच्या दिवसापर्यंत तू एक क्रिकेटपटू आणि कर्णधार म्हणून भारतीय कसोटी क्रिकेटला खूप काही दिले. रोहितचे योगदान सर्वोत्तम आहे. वेल डन, रोहित. तुझ्या अप्रतिम कसोटी कारकिर्दीसाठी खूप खूप अभिनंदन. आणि तुझ्या पुढील वाटचालीसाठी खूप शुभेच्छा. कसोटी क्रिकेटमधून निवृत्तीची घोषणा करताना रोहित शर्माने त्याच्या इंस्टाग्रामवर एक स्टोरी शेअर केली. ’भारताच्या कसोटी संघाचे प्रतिनिधित्व करणे माझ्यासाठी मोठा सन्मान आहे. गेल्या काही वर्षांपासून मिळालेल्या प्रेम आणि पाठिंब्याबद्दल धन्यवाद. मी एकदिवसीय क्रिकेटमध्ये भारतीय संघाचे प्रतिनिधित्व करत राहीन’, असे रोहित शर्माने म्हटले.

ऑस्ट्रेलियाविरुद्ध बॉर्डर- गावस्कर ट्रॉफीमधील चौथा कसोटी सामना रोहित शर्माच्या कसोटी कारकिर्दीतील शेवटचा सामना ठरला, जो भारताने गमावला होता. रोहितने ६७ कसोटी सामन्यांमध्ये ४०.५७ च्या सरासरीने १२ शतके आणि १८ अर्धशतकांसह ४ हजार ३०१ धावा केल्या. तसेच २४ कसोटी सामन्यात भारताचे नेतृत्व केले. यातील १२ सामने जिंकले आणि नऊ सामन्यात संघाला पराभव पत्करावा लागला. रोहितच्या निवृत्तीनंतर आता आगामी इंग्लंड दौर्‍यासाठी भारतीय संघाला नवीन कसोटी कर्णधार मिळणार हे स्पष्ट झाले आहे. जसप्रीत बुमराह, केएल राहुल, शुभमन गिल आणि ऋषभ पंत यांची नावे शर्यतीत आघाडीवर आहेत.